आफ्नै नवजात शिशुको हत्यामा गोबिन्द लामिछाने पक्राउ ।

 नवजात शिशु हत्या प्रकरणमा एक जना पक्राउ, १० महिनापछि खुलेको रहस्य

पोखरा, साउन ६ — पोखराको चाउथेमा झोलाभित्र फेला परेको नवजात शिशुको रहस्यमय हत्या प्रकरणमा करिब १० महिनापछि कास्की प्रहरीले एक जनालाई पक्राउ गरेको छ। पक्राउ पर्ने व्यक्ति ३७ वर्षीय गोविन्द लामिछाने हुन्, जसको स्थायी ठेगाना नुवाकोटको बेलकोटगढी नगरपालिका–५ र हालको बसोबास पोखरा महानगरपालिका–९, नागढुङ्गामा रहेको छ।

कास्की प्रहरीले लामिछानेलाई आफ्नै नवजात शिशुको हत्या गरेको आरोपमा नियन्त्रणमा लिएको हो। जिल्ला प्रहरी कार्यालय कास्कीका प्रहरी नायब उपरीक्षक (डीएसपी) हरिबहादुर बस्नेतका अनुसार, लामिछानेलाई श्रीमती सुत्केरी व्यथाले च्यापिएपछि अस्पताल ल्याएको समयमा नियन्त्रणमा लिइएको हो।

“उनी श्रीमतीलाई पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालमा भर्ना गराउन आएका थिए,” डीएसपी बस्नेतले जानकारी दिए, “त्यही मौकामा प्रहरीको निगरानीमा रहेका उनीलाई पक्राउ गरियो।”

२०७८ साल असोज १३ गते साँझ ५:१५ बजेतिर, पोखरा महानगरपालिका–१४, चाउथेस्थित पृथ्वी राजमार्गको छेउमा रहेको सडक किनारमा झोलाभित्र नवजात शिशुको शव फेला परेको थियो। शिशु पुरुष थियो र शवलाई फलाटिनको कपडाले बेरेर जेब्रा झोलामा राखिएको थियो।
घटना पछि शवलाई पोखरा स्वास्थ्य विज्ञान प्रतिष्ठानमै पोस्टमार्टम गरिएको थियो। पोष्टमार्टम रिपोर्टले शिशुको शरीरमा गम्भीर चोटपटक तथा घाँटी निमोठिएको देखाएको बताइएको थियो, जसले हत्या पुष्टि गरेको प्रहरी स्रोतले जनाएको छ।

हत्या प्रकरणसँग जोडिएका शंकाकासाथ लामिछानेलाई पछिल्लो केही महिनादेखि अनौपचारिक निगरानीमा राखिएको थियो। तर, ठोस प्रमाण अभावका कारण प्रहरी प्रत्यक्ष कारवाहीमा जान सकेको थिएन।
अन्ततः साउन ६ गते उनलाई अस्पतालबाटै पक्राउ गरी कास्की जिल्ला अदालतमा पेस गरिएको छ। अदालतबाट सात दिनको म्याद थप गरी अनुसन्धान अगाडि बढाइएको प्रहरीले जनाएको छ।

नेपालको फौजदारी (दण्ड) संहिताअनुसार, नवजात शिशुको हत्या कर्तव्य ज्यानअन्तर्गत पर्दछ र दोषी ठहरिएमा जन्मकैदसम्मको सजाय तोक्न सकिन्छ। प्रहरीले हाल उनीमाथि यही दफा अन्तर्गत मुद्दा चलाउने तयारी गरिरहेको बुझिएको छ।