जन्मकैदबाट छुटेपछि अफताब आलमलाई ब्रेन स्ट्रोक, अवस्था गम्भीर।
काठमाडौं संवाददाता
जेष्ठ १६, २०८२
नेपाली कांग्रेसका नेता तथा पूर्वमन्त्री अफताब आलमलाई मस्तिष्कघात (ब्रेन स्ट्रोक) भई अस्पताल भर्ना गरिएको छ। आज बिहान करिब ९ बजे शारीरिक असहजता देखिएपछि उनलाई तत्काल अन्नपूर्ण न्यूरो अस्पताल, काठमाडौंमा पुर्याइएको पारिवारिक स्रोतले जनाएको छ।
अलिकति दिनअघि मात्र आलमलाई बहुचर्चित इँटाभट्टा घटनामा जन्मकैदको सजाय भोगिरहेका बेला उच्च अदालत वीरगञ्जले सफाइ दिएको थियो। उक्त फैसलापछि उनी नख्खु कारागारबाट रिहा भएका थिए।
रिहाइको केही दिनमै स्वास्थ्यमा समस्या देखिएपछि हाल उनी अस्पतालको निगरानीमा रहेका छन्। चिकित्सकहरूका अनुसार प्रारम्भिक परीक्षणमा मस्तिष्कघात पुष्टि भएको छ र आवश्यक उपचार प्रक्रिया जारी छ।
उनको स्वास्थ्य अवस्थाबारे थप विवरण सार्वजनिक भइनसकेको भए पनि पारिवारिक स्रोतका अनुसार चिकित्सकहरूको टोलीले नियमित अनुगमन गरिरहेको छ।
