अखिल (क्रान्तिकारी) बागमती प्रदेशद्वारा आयोजित कोणसभा पुरानो कालिमाटी, बाफलमा सम्पन्न।
अखिल (क्रान्तिकारी) बागमती प्रदेशद्वारा आयोजित कोणसभा सम्पन्न, शैक्षिक व्यापारीकरणविरुद्ध कडा आवाज।
काठमाडौं, असार २४ –
नेकपा (बहुमत) निकट अखिल (क्रान्तिकारी) बागमती प्रदेश समितिको आयोजनामा शनिबार काठमाडौंको पुरानो कालिमाटी, बाफलमा एक भव्य कोणसभा कार्यक्रम सम्पन्न भएको छ। कार्यक्रममा शिक्षा क्षेत्रमा बढ्दो व्यापारिक हस्तक्षेप, बेरोजगारी, निजीकरण, साम्राज्यवादलगायत जनविरोधी नीतिहरूविरुद्ध कडा रुपमा आवाज उठाइएको छ।
कोणसभामा विद्यार्थी, स्थानीय नागरिक तथा संगठनका अगुवा नेता–कार्यकर्ताको उल्लेखनीय उपस्थिति देखिएको थियो। सहभागीहरूमा शैक्षिक अधिकारप्रति गहिरो सरोकार र अन्यायविरुद्ध प्रतिरोधको भावना स्पष्ट रूपमा झल्किएको थियो।
कार्यक्रमलाई सम्बोधन गर्दै अखिल (क्रान्तिकारी)का सचिव गोविन्द विष्टले भने,
> “राज्यले शैक्षिक माफियाहरूको होइन, विद्यार्थीहरूको आवाज सुन्नुपर्छ। सार्वजनिक शिक्षालाई निःशुल्क, गुणस्तरीय र सर्वसुलभ बनाउनेतर्फ सरकार गम्भीर देखिँदैन। त्यसैले आजको विद्यार्थी आन्दोलन केवल शैक्षिक सुधारको लागि होइन, सामाजिक न्याय र समग्र प्रणाली परिवर्तनको पक्षमा पनि हो।”
विष्टले निजी विद्यालयहरूद्वारा गरिँदै आएको आर्थिक शोषण, मनोमानी शुल्क, र राज्यको लाचार भूमिकालाई लक्षित गर्दै तीव्र आलोचना गरे। उनले सार्वजनिक शैक्षिक संस्थाहरूको क्षमतामा विश्वास गर्दै त्यसको सुदृढीकरण गर्नुपर्नेमा जोड दिए।
अन्य वक्ताहरूले पनि शिक्षा क्षेत्रलाई नाफाको स्रोत बनाउने प्रवृत्तिको आलोचना गर्दै यस्तो गलत दिशालाई प्रतिरोध गर्न विद्यार्थी आन्दोलन अझ सशक्त ढंगले अगाडि बढाइने बताए। कार्यक्रमले अखिल (क्रान्तिकारी)द्वारा अघि सारिएको “शिक्षामा समता र सामाजिक न्याय” को अभियानलाई थप सशक्त बनाउने निर्णय समेत गरेको छ।
कोणसभा शान्तिपूर्ण, अनुशासित र ऊर्जाशील वातावरणमा सम्पन्न भएको थियो। कार्यक्रम पश्चात विभिन्न नारासहितको ¥याली समेत निकालिएको थियो, जसले स्थानीय जनसमुदायको ध्यान आकर्षण गरेको थियो।
