गणतन्त्र दिवस समारोह: प्रधानमन्त्री बालेन्द्र शाहले सम्बोधन नगर्ने, राष्ट्रपतिलाई पत्राचार
गणतन्त्र दिवस समारोह: प्रधानमन्त्री बालेन्द्र शाहले सम्बोधन नगर्ने, राष्ट्रपतिलाई पत्राचार
काठमाडौँ, १२ जेठ।
आगामी जेठ १५ गते देशव्यापी रूपमा मनाइने गणतन्त्र दिवसको मूल समारोहमा प्रधानमन्त्री बालेन्द्र शाहले सम्बोधन नगर्ने भएका छन्। सरकारको कार्यकारी प्रमुखले राष्ट्रिय दिवसका अवसरमा सम्बोधन गर्ने स्थापित परम्परा रहे पनि यस पटक प्रधानमन्त्री शाहले समारोहलाई सम्बोधन नगर्ने निर्णय लिएका हुन्।
प्रधानमन्त्री शाहको यो निर्णयसँगै प्रधानमन्त्री कार्यालयले आगामी गणतन्त्र दिवसको विशेष समारोहमा राष्ट्रपतिबाटै सम्बोधन गराउन अनुरोध गर्दै राष्ट्रपति कार्यालयलाई औपचारिक पत्राचार समेत गरिसकेको छ।
स्रोतका अनुसार मन्त्रिपरिषद् बैठकबाटै यो विषयमा औपचारिक निर्णय गरी राष्ट्रपतिलाई पत्राचार गर्ने मार्गप्रशस्त गरिएको थियो। सोही निर्णयका आधारमा मुख्य सचिव सुमनराज अर्यालले राष्ट्रपति कार्यालय शीतलनिवासमा अनुरोध पत्र बुझाएका हुन्। सरकारले औपचारिक पत्र मात्र नभई अनौपचारिक माध्यमबाट पनि राष्ट्रपतिलाई सम्बोधनका लागि आग्रह गरिरहेको बुझिएको छ।
प्रधानमन्त्री कार्यालयले गणतन्त्रको सर्वोच्च प्रतीक र राष्ट्रको अभिभावक राष्ट्रपति नै भएको तर्क अघि सार्दै यस्तो विशेष अवसरमा राष्ट्रपतिबाटै सम्बोधन हुनु वाञ्छनीय र गरिमामय हुने अडान राखेको छ। राष्ट्रपति कार्यालयका प्रवक्ता रितेशकुमार शाक्यले प्रधानमन्त्री कार्यालयबाट यस सम्बन्धी पत्र प्राप्त भएको पुष्टि गरेका छन्।
बालेन्द्र शाह प्रधानमन्त्री बन्नुअघि काठमाडौँ महानगरपालिकाको प्रमुख (मेयर) रहँदा पनि गणतन्त्र दिवसका औपचारिकता र विशेष समारोहहरूलाई बहिष्कार गर्दै आएका थिए। आफ्नो पुरानो कार्यशैली र मान्यतालाई निरन्तरता दिँदै उनले प्रधानमन्त्री भएपछि पनि गणतन्त्र दिवसको मञ्चमा आफैँ सम्बोधन गर्न अनिच्छा देखाएका हुन्। प्रधानमन्त्रीको यो अप्रत्याशित कदम र राष्ट्रपतिको सम्बोधनका लागि गरिएको विशेष आग्रहलाई राजनीतिक वृत्तमा अर्थपूर्ण रूपमा हेरिएको छ।
