प्रधानमन्त्री बालेन असफल भएको हर्क साम्पाङको आरोप, राजीनामा दिन माग
प्रधानमन्त्री बालेन असफल भएको हर्क साम्पाङको आरोप, राजीनामा दिन माग
काठमाडौँ (जेठ ७) — राष्ट्रिय श्रम शक्ति पार्टीका केन्द्रीय अध्यक्ष एवम् प्रतिनिधि सभा सदस्य (सांसद) हर्क साम्पाङले प्रधानमन्त्री बालेन शाहलाई तत्काल पदबाट राजीनामा दिँदै मार्ग प्रशस्त गर्न गम्भीर सुझाव दिएका छन्। देशको पछिल्लो राजनीतिक संकट, संसद्भित्रको गतिरोध र नागरिकका जनजीविकाका सवालमा सरकार उदासीन बनेको भन्दै अध्यक्ष साम्पाङले प्रधानमन्त्रीको राजीनामा मागेका हुन्।
आज जेठ ७ गते बसेको प्रतिनिधि सभाको बैठकमा विशेष समय लिएर बोल्दै सांसद साम्पाङले सरकारको कार्यशैलीमाथि कडा आक्रोश पोखे। उनले देशमा सुकुम्बासी समस्या थप जटिल बन्दै गएको र सीमा सुरक्षाका सवालमा सरकारले ठोस कूटनीतिक पहल गर्न नसकेको आरोप लगाए। संसद्को रोस्टमबाटै राष्ट्रियता र गरिब जनताका मुद्दा उठाउँदै उनले वर्तमान सरकार पूर्ण रूपमा असफल भइसकेको दाबी गरे।
विशेष गरी सरकारको नीति तथा कार्यक्रममाथि संसद्मा उठाइएका प्रश्नहरूको जवाफ दिन प्रधानमन्त्री बालेन शाह बैठकमा उपस्थित नभएको भन्दै साम्पाङले आपत्ति जनाए। बजेटको नीति तथा कार्यक्रममा संसद्मा गम्भीर प्रश्नहरू उठ्दा पनि प्रधानमन्त्रीले संसद्लाई छलेर गैरजिम्मेवारपन देखाएको उनको तर्क थियो।
”जनताले व्यवस्था र अनुहार बदल्न ठुलो भरोसाका साथ नयाँ शक्तिलाई म्यान्डेट दिएका हुन्। तर सुकुम्बासी र सीमा जस्ता राष्ट्रिय समस्या समाधान गर्नु त कता हो कता, बजेटको नीति तथा कार्यक्रममा उठेका प्रश्नको सामना गर्न समेत डराएर प्रधानमन्त्री संसद्मा उपस्थित हुनुहुन्न,” प्रतिनिधि सभा बैठकमा आफ्नो कुरा राख्दै सांसद साम्पाङले भने, “यदि संसद् र जनताप्रति उत्तरदायी भएर परिणाममुखी काम गर्न सकिँदैन भने प्रधानमन्त्री बालेन शाहले मार्ग प्रशस्त गर्दा नै देश र जनताको हित हुन्छ।”
सदन र सडक दुवै ठाउँबाट श्रमजीवी वर्गको आवाज बुलन्द गर्दै आएका अध्यक्ष साम्पाङले संसद्मा प्रतिपक्षी दलहरूलाई बाइपास गर्ने प्रवृत्तिको कडा विरोध गरे। उनले राष्ट्रिय श्रम शक्ति पार्टीले देशका गम्भीर मुद्दाहरूमा सरकारलाई निरन्तर खबरदारी गरिरहने र जनसरोकारका सवालमा कुनै सम्झौता नगर्ने स्पष्ट पारे।
संसद्को आजको बैठकमा साम्पाङले राखेको यो कडा अभिव्यक्तिले राजनीतिक वृत्त र सदनभित्र नयाँ तरङ्ग पैदा गरेको छ। यस विषयमा प्रधानमन्त्री कार्यालय वा प्रधानमन्त्री बालेन शाहका तर्फबाट हालसम्म कुनै आधिकारिक प्रतिक्रिया आइसकेको छैन। तर, संसद्मा सरकारलाई जवाफदेही बनाउन राष्ट्रिय श्रम शक्ति पार्टीले चालेको यो कदमले आगामी राजनीतिक समीकरणमा नयाँ बहस छेडिदिएको छ।
