प्रधानमन्त्रीको बधाई: ‘दुश्मन हेरेको हेर्यै’ गीतले पाँच महिनामै १० करोड भ्यु पार गर्यो।
प्रधानमन्त्रीको बधाई: ‘दुश्मन हेरेको हेर्यै’ गीतले पाँच महिनामै १० करोड भ्यु पार गर्यो
काठमाडौं, असार ८ –
नेपाली संगीत क्षेत्रमा फेरि एकपटक नयाँ इतिहास बनेको छ। चर्चित गायक तथा सर्जक दुर्गेश थापाको नयाँ गीत ‘दुश्मन हेरेको हेर्यै’ ले पाँच महिनामा युट्युबमा १०० मिलियन (१० करोड) भ्यु पाउन सफल भएको छ।
यस ऐतिहासिक उपलब्धिप्रति प्रधानमन्त्री केपी शर्मा ओली समेत प्रभावित बनेका छन्। उनले सामाजिक सञ्जालमार्फत् गीतको सफलतामा दुर्गेश थापालाई बधाई दिँदै लेखेका छन् –
“आजको नयाँ पिँढीले बेग्लै स्वादका गीत/संगीतमा रुचि देखाउन थालेको ‘दुश्मन हेरेको हेर्यै’ गीतको भ्युवरबाट थाहा हुन्छ। दुर्गेश थापाको यो गीत सुन्नेको संख्या पाँच महिनामा १०० मिलियन (१० करोड) पुगेको छ। गीतका सर्जक दुर्गेश थापालाई बधाई !”
प्रधानमन्त्रीको यस्तो सार्वजनिक बधाई संगीतकर्मी दुर्गेश थापा मात्र नभई सम्पूर्ण नेपाली संगीत क्षेत्रको मनोबलका लागि उत्साहजनक मानिएको छ।
‘दुश्मन हेरेको हेर्यै’ गीत विशेषगरी युवापुस्तामाझ निकै लोकप्रिय बनेको छ। आकर्षक शब्द, चल्तीको लय र नृत्य शैलीले सजिएको यो गीतले टिकटक, इन्स्टाग्राम लगायतका सामाजिक प्लेटफर्महरूमा समेत व्यापक प्रतिक्रिया पाएको छ।
गीतमा दुर्गेश थापा आफैंको गायन, अभिनय तथा कोरियोग्राफी रहेको छ। संगीत संयोजन, दृश्य सम्पादन र छायांकन पक्ष समेत सशक्त रहेको यो गीतका दृश्यहरु रंगीन र मनोरञ्जनात्मक छन्।
यो गीतको सफलता नेपाली संगीत उद्योगको डिजिटल भविष्य कतातिर जाँदैछ भन्ने संकेत पनि हो। युट्युब जस्तो प्लेटफर्ममा छोटो समयमै १० करोड भ्यु पुग्नु सजिलो कुरा होइन। यो उपलब्धिलाई सांगीतिक उद्योगका विज्ञहरुले ‘Game Changer’ को रुपमा लिएका छन्।
प्रधानमन्त्रीजस्तो राष्ट्र प्रमुखद्वारा सांगीतिक सफलतामा खुलेर बधाई दिनु आफैँमा प्रेरणादायी कुरा हो। यसबाट सरकार र नेतृत्व तहले सिर्जनशीलता र कलाकारिताप्रति देखाएको सकारात्मक दृष्टिकोणको पनि झल्को पाइन्छ।
दुर्गेश थापाले यसअघि पनि ‘बीच बजारमा’, ‘पोइल जान पाम्’, ‘बिच बिचमा’ जस्ता गीतहरू मार्फत दर्शकको मन जितिसकेका छन्। तर ‘दुश्मन हेरेको हेर्यै’ ले उनको सांगीतिक करियरमा ऐतिहासिक उचाइ थपिदिएको छ।
अबको चुनौती भनेको यो सफलतालाई निरन्तरता दिने र नेपाली मौलिक संगीतलाई अझै अन्तर्राष्ट्रिय स्तरमा स्थापित गर्ने हो।
