मेयर शाह : “महानगर प्रहरीको कार्यशैली हलिउड फिल्ममा देखेझैं प्रभावकारी”।
मेयर शाह : “महानगर प्रहरीको कार्यशैली हलिउड फिल्ममा देखेझैं प्रभावकारी”
काठमाडौँ — काठमाडौँ महानगरपालिकाका मेयर बालेन्द्र शाहले महानगर प्रहरीको कार्यशैलीप्रति खुलेर प्रशंसा गरेका छन्। शनिबार ३३औँ महानगर प्रहरी दिवसको अवसरमा आयोजित समारोहलाई सम्बोधन गर्दै उनले महानगर प्रहरीले देखाएको तत्परता, सक्रियता र अनुशासन राजधानीका बासिन्दाका लागि नयाँ अनुभव भएको उल्लेख गरे।
शाहका अनुसार, आफूले सानैमा हलिउड फिल्महरूमा मात्र देखेको सिटी पुलिसको शैली अहिले काठमाडौँमै व्यवहारमा देख्न पाइने अवस्था आएको छ। “अब महानगर प्रहरीलाई केवल अनुगमन गर्ने निकायको रूपमा होइन, शहरलाई व्यवस्थित बनाउन नेतृत्व गर्ने संयन्त्रका रूपमा नागरिकले महसुस गर्न थालेका छन्,” शाहले भने।
उनले महानगर प्रहरीलाई अझ व्यावसायिक, प्रविधिमैत्री र जनमुखी बनाउनुपर्ने आवश्यकता औंल्याउँदै कर्मचारीहरूको आत्मविश्वास बढाउन निरन्तर तालिम र आधुनिक उपकरणको प्रयोग अनिवार्य हुने बताए।
कार्यक्रममा विगत एक वर्षमा महानगर प्रहरीले देखाएको सक्रियता, उपलब्धि र सुधारका प्रयासहरूको समीक्षा गरिएको थियो। साथै उत्कृष्ट योगदान पुर्याउने प्रहरीलाई सम्मानसमेत गरिएको थियो। मेयर शाहले राजधानीलाई व्यवस्थित, सुरक्षित र अनुशासित बनाउन महानगर प्रहरीको भूमिका निर्णायक हुने विश्वास व्यक्त गरे।
