ब्रेकिङ न्युज कांग्रेसमा विस्फोट: महामन्त्रीद्वय गगन र विश्वप्रकाशलाई पार्टीबाट निष्कासन गर्ने संस्थापन पक्षको निर्णय
कांग्रेसमा विस्फोट: महामन्त्रीद्वय गगन र विश्वप्रकाशलाई पार्टीबाट निष्कासन गर्ने संस्थापन पक्षको निर्णय
काठमाडौं, १ माघ ।
नेपाली कांग्रेसभित्रको आन्तरिक कलहले अन्ततः पार्टीलाई औपचारिक विभाजनको सँघारमा पुर्याएको छ ।
बुधबार सानेपास्थित केन्द्रीय कार्यालयमा बसेको संस्थापन पक्षको केन्द्रीय समिति बैठकले महामन्त्रीद्वय गगन थापा र विश्वप्रकाश शर्मालाई पार्टीबाट निष्कासन गर्ने अप्रत्याशित निर्णय गरेको हो ।
पार्टी विधान र हितविपरीत गतिविधिमा संलग्न रहेको ठहर गर्दै संस्थापन पक्षले उनीहरूलाई साधारण सदस्य समेत नरहने गरी कारबाही गरेको दाबी गरेको छ ।
संस्थापन पक्षका नेताहरूको दाबीअनुसार महामन्त्रीद्वयले पार्टीको आधिकारिक नीति र नेतृत्वलाई चुनौती दिँदै समानान्तर गतिविधि सञ्चालन गरेका थिए । विशेषगरी भृकुटीमण्डपमा जारी भनिएको ‘विशेष महाधिवेशन’ लाई संस्थापन पक्षले अवैध ठहर गरेको छ ।
”पार्टीको विधान मिचेर नेतृत्वलाई बदनाम गर्ने र विद्रोही गतिविधि गर्ने छुट कसैलाई छैन,” संस्थापन पक्षका एक प्रभावशाली नेताले भने, “अनुशासनको घेरा नाघेपछि बैठकले उनीहरूलाई निष्कासन गर्ने कठोर निर्णय लिनु परेको हो ।”
पार्टीमा संकटको बादल
महामन्त्रीद्वयमाथिको यो कारबाहीसँगै नेपाली कांग्रेसमा ७० वर्षभन्दा लामो इतिहासमा अर्को ठूलो फुटको संकेत देखिएको छ । गगन-विश्वप्रकाश पक्षले भने यो निर्णयलाई ‘अवैध र कायरतापूर्ण’ भन्दै प्रतिकार गर्ने चेतावनी दिएको छ ।
भृकुटीमण्डपमा भेला भएका महामन्त्री पक्षधर कार्यकर्ताहरूले सानेपाको निर्णयलाई ठाडै अस्वीकार गरेका छन् । उनीहरूले आफूहरू नै असली कांग्रेस भएको दाबी गर्दै निर्वाचन प्रक्रिया अगाडि बढाउने बताएका छन् ।
पार्टीको आधिकारिकताको विवाद अब निर्वाचन आयोगसम्म पुग्ने देखिएको छ । संस्थापन पक्षले कारबाहीको पत्र निर्वाचन आयोगलाई पठाउने तयारी गरेको छ भने महामन्त्री पक्षले बहुमत महाधिवेशन प्रतिनिधिको हस्ताक्षरसहित आयोगमा दाबी पेश गर्ने तयारी गरिरहेको बुझिएको छ ।
