सिन्धुली बैंक डकैती अपडेट: १ करोड ८० लाख बरामद, चार जना पक्राउ
सिन्धुली बैंक डकैती अपडेट: १ करोड ८० लाख बरामद, चार जना पक्राउ
पुस ३० सिन्धुली,
सिन्धुलीको घ्याङलेख गाउँपालिका-२ स्थित नेपाल एसबीआई बैंकको शाखाबाट लुटिएको रकममध्ये झण्डै आधा रकम बरामद भएको छ। मंगलबार बेलुका भएको भीषण लुटपाटको घटनापछि प्रहरीले चलाएको विशेष सर्च अप्रेसनका क्रममा हालसम्म १ करोड ८० लाख १० हजार ५०० रुपैयाँ फेला परेको हो।
बैंकबाट कुल ३ करोड ११ लाख ९५ हजार २८३ रुपैयाँ लुटिएको बैंक व्यवस्थापनले पुष्टि गरेको छ। बाँकी १ करोड ३१ लाख रुपैयाँ र फरार लुटेराहरूको खोजीका लागि प्रहरीले सिन्धुली र काभ्रेको सीमा क्षेत्रमा कडा नाकाबन्दी गरेको छ।
चार जना नियन्त्रणमा, चालकको रहस्यमयी बयान
प्रहरीले लुटपाटमा संलग्न भएको आशंकामा हालसम्म ४ जनालाई नियन्त्रणमा लिएको छ। लुटेराहरूले फरार हुन प्रयोग गरेको विएडी ०३९८ नम्बरको टाटा सुमो र त्यसका चालक भवत सिंह थापालाई प्रहरीले पक्रेको हो। पक्राउ परेका चालकले आफूलाई ‘केटी भगाउन जानु छ’ भन्दै गाडी बुक गरिएको तर पछि हतियारधारी समूहले बैंक लुटेको दाबी गरेका छन्।
लुटेराहरूको प्रतिकार गर्न खोज्दा बैंकका सुरक्षा गार्ड रुद्रबहादुर कार्की गम्भीर घाइते भएका छन्। नकाबधारी समूहले खुकुरी प्रहार गर्दा उनको हातमा गहिरो चोट लागेको छ। उनको हाल उपचार भइरहेको र अवस्था खतरामुक्त रहेको प्रहरीले जनाएको छ।
मंगलबार करिब ७:४५ बजेको समयमा १० जनाको समूहमा आएका हतियारधारीले बैंकका कर्मचारी र गार्डलाई नियन्त्रणमा लिएका थिए। विकट क्षेत्र र सञ्चारको असुविधाको फाइदा उठाउँदै उनीहरूले बोरामा पैसा भरेर भागेका थिए। स्थानीय बासिन्दा र प्रहरीको सक्रियताका कारण केही रकम जंगलको बाटोमा फालेको अवस्थामा बरामद गरिएको हो।
जिल्ला प्रहरी कार्यालय सिन्धुलीका अनुसार, फरार रहेका अन्य ५-६ जना लुटेराहरू जंगलमै लुकेको हुनसक्ने आशंकामा तालिमप्राप्त कुकुरसहितको टोली परिचालन गरिएको छ।
