नयाँ वर्ष २०८३ : देशभर उमङ्ग र उत्साह, नयाँ सुरुआतको शुभकामना

काठमाडौं, वैशाख १ (२०८३) – आजदेखि विक्रम संवत् २०८३ को प्रारम्भ भएको छ । देशभरका नेपालीहरूले नयाँ वर्षलाई नयाँ उमङ्ग, उत्साह र नयाँ सुरुआतको रूपमा हर्षोल्लासका साथ मनाइरहेका छन् ।

वैशाख १ गतेलाई बिस्केट जात्रा, मेश संक्रान्ति जस्ता सांस्कृतिक पर्वसँग जोडेर मनाउने परम्परा अनुसार घर–घरमा सरसफाइ, मन्दिर दर्शन, शुभकामना आदानप्रदान र सांस्कृतिक कार्यक्रमहरू भइरहेका छन् ।राष्ट्रपति रामचन्द्र पौडेलले नयाँ वर्षको अवसरमा शुभकामना सन्देश जारी गर्दै यस दिनलाई देशको साझा राष्ट्रिय लक्ष्य निर्धारण गर्ने र त्यसलाई पूरा गर्न संकल्प गर्ने दिनका रूपमा उपयोग गर्न आह्वान गर्नुभएको छ । उहाँले सुख, शान्ति, समृद्धि र सुस्वास्थ्यको कामना गर्दै सफलता संयोगले नआउने भन्दै दृढता, अनुशासन र निरन्तर प्रयासबाट मात्र प्राप्त हुने बताउनुभयो ।
उपराष्ट्रपति रामसहायप्रसाद यादवले नयाँ वर्षलाई केवल पात्रो फेरिने दिन नभई नौलो कामको थालनी, सकारात्मक सोचको विकास, भ्रातृत्व भावना र स्वस्थ जीवनशैली अपनाउने अवसरका रूपमा लिनुपर्नेमा जोड दिनुभएको छ । प्रधानमन्त्री बालेन्द्र शाह लगायत अन्य उच्च पदाधिकारीहरूले पनि नेपाली जनताको उन्नति, प्रगति र समृद्धिका लागि शुभकामना व्यक्त गर्नुभएको छ। ।
देशभरका विभिन्न ठाउँमा विशेष कार्यक्रमहरू आयोजना गरिएका छन् । काठमाडौंको थामेलमा   बसन्तपुर दरबार क्षेत्र, स्वयम्भू, पशुपतिनाथ लगायतका मन्दिरहरूमा भक्तजनको घुइँचो लागेको छ । भक्तपुरमा बिस्केट जात्रा भव्य रूपमा मनाइँदै छ भने पोखरा, चितवन, लुम्बिनी जस्ता पर्यटकीय स्थलहरूमा पनि पर्यटक र स्थानीयले नयाँ वर्षको रमझम गरिरहेका छन् ।
विश्वभर छरिएका नेपालीहरूले पनि आफ्नो ठाउँमा नयाँ वर्ष मनाइरहेका छन् । सामाजिक सञ्जालमा शुभकामना आदानप्रदान, सांस्कृतिक नृत्य तथा संगीतका कार्यक्रमहरूले उत्सवको वातावरण बनाएको छ । नयाँ वर्षमा नेपालीहरूले विगतको समीक्षा गर्दै नयाँ संकल्प लिने र आगामी वर्षलाई सफल बनाउने प्रतिबद्धता जनाउने गरेका छन् ।
यो नयाँ वर्षले नेपालमा शान्ति, स्थिरता र आर्थिक समृद्धिको नयाँ अध्याय सुरु गरोस् भन्ने सबैको कामना छ । नयाँ वर्ष २०८३ को सबै नेपालीलाई हार्दिक शुभकामना !