समाजमा ‘घृणाको व्यापार’ बन्द गरौँ, मौलिक सभ्यता जोगाउन पत्रकारको भूमिका ठूलो छ: अध्यक्ष ओली

समाजमा ‘घृणाको व्यापार’ बन्द गरौँ, मौलिक सभ्यता जोगाउन पत्रकारको भूमिका ठूलो छ: अध्यक्ष ओली
​काठमाडौँ | चैत ८, २०८२
​नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले नेपाली समाजको मौलिक पहिचान र संस्कृतिमाथि प्रहार भइरहेको भन्दै ‘घृणाको व्यापार’ तत्काल बन्द गर्न आह्वान गर्नुभएको छ। बुवाको निधनपछि शोक व्यक्त गर्न आफ्नो निवास पुगेका सञ्चारकर्मीहरूसँगको छलफलमा उहाँले नेपाली समाजमा बढ्दो उग्रता र अशिष्टताप्रति गम्भीर चिन्ता व्यक्त गर्नुभयो।
​अध्यक्ष ओलीले नेपालको सभ्यता र संस्कृति विश्वकै लागि नमूना रहेको स्मरण गराउँदै भन्नुभयो, “मिलनसार स्वभाव, शिष्टता, मर्यादा र आदर्श नेपाली समाजको जग हो। तर, दुर्भाग्यवश केही समयदेखि यो जग हल्लिएको छ। नेपालीहरूबीच डरलाग्दो गरी घृणा फैलाउने खेल भइरहेको छ।”
​’सेलिब्रेटी’ बन्ने होडले संस्कृतिमाथि प्रहार
​पछिल्लो समय सामाजिक सञ्जाल र विभिन्न माध्यमबाट जति धेरै घृणा फैलाउन सकियो, त्यति नै छिटो ‘सेलिब्रेटी’ बनिन्छ भन्ने गलत मानसिकता हावी भएको ओलीको विश्लेषण छ। “धेरै घृणा फैलाएर चर्चामा आउने होडबाजीले हाम्रो भाषा र संस्कृतिलाई नराम्रोसँग बिगारिरहेको छ,” उहाँले भन्नुभयो, “मैले यो कुरा पहिलेदेखि नै उठाउँदै आएको छु, अब अति भयो। यो घृणाको व्यापारले देशलाई कतै पुर्‍याउँदैन।”
​
​अध्यक्ष ओलीले समाजलाई सही दिशा दिन पत्रकारहरूको भूमिका सबैभन्दा महत्वपूर्ण हुने उल्लेख गर्नुभयो। पढेलेखेका र सामाजिक कार्यमा लागेका व्यक्तिहरू नै यस अभियानमा अग्रसर हुनुपर्ने उहाँको तर्क छ।
​”तपाईं पत्रकारहरूबाटै यसको सुरुवात होस्। नेपाली मौलिक संस्कृति र सभ्यतालाई जोगाउन सकिएन भने हामी निकै डरलाग्दो खाडलमा फस्नेछौँ,” उहाँले चेतावनी दिनुभयो। समाजलाई पुरानै सभ्य र मर्यादित स्वरूपमा फर्काउनका लागि सबै मिलेर ठोस पहलकदमी लिनुपर्नेमा उहाँको विशेष आग्रह थियो।