प्रभु बैंकमा सीआईबी र राष्ट्र बैंकको संयुक्त छापा, शंकास्पद फाइलहरू नियन्त्रणमा।
प्रभु बैंकमा सीआईबी र राष्ट्र बैंकको संयुक्त छापा, शंकास्पद फाइलहरू नियन्त्रणमा
काठमाडौं, कार्तिक २२ — नेपाल प्रेस
नेपाल प्रहरीको केन्द्रीय अनुसन्धान ब्युरो (सीआईबी) र नेपाल राष्ट्र बैंकको संयुक्त टोलीले प्रभु बैंकमा छापा मारेको छ। गम्भीर आर्थिक अपचलनसँग सम्बन्धित उजुरीका आधारमा गरिएको उक्त छानबिनले बैंकिङ क्षेत्रमा पुनः पारदर्शिता र नियमनको सवाल उठाएको छ।
सीआईबीका प्रमुख एआईजी डा. मनोजकुमार केसीका अनुसार, शुक्रबार साँझ राजधानीस्थित प्रभु बैंकको कार्यालयमा पुगेको टोलीले शंकास्पद कारोबार र ठगीसम्बन्धी विभिन्न फाइलहरू नियन्त्रणमा लिएको हो। उनले भने, “नेपाल राष्ट्र बैंकसँग सहकार्यमा ती फाइलमाथि अनुसन्धान सुरु भइसकेको छ।”
यो कार्यवाही प्रभु समूहका अध्यक्ष देवीप्रसाद भट्टचन पक्राउ परेपछि तीव्र बनेको हो। भट्टचनलाई गत कात्तिक ११ गते ललितपुरबाट पक्राउ गरिएको थियो। उनीमाथि प्रभु म्यानेजमेन्टकी अध्यक्ष कुसुम लामाले ९८ करोड रुपैयाँ ठगी गरेको आरोपमा जाहेरी दर्ता गरेकी थिइन्।
सरकारी वकिलको कार्यालयले सो जाहेरी गत वर्ष असोज ११ गते नै प्रहरी परिसर, काठमाडौंमा पठाएको थियो। तर, लामो समयसम्म अनुसन्धान नबढेपछि सीआईबीले प्रत्यक्ष हस्तक्षेप गर्दै अनुसन्धानको जिम्मा लिएको हो। त्यसपछि मात्रै पक्राउ प्रक्रिया अघि बढाइएको बताइन्छ।
सीआईबी स्रोतका अनुसार, भट्टचन मात्र होइन, अर्का केही व्यक्तिहरू पनि १८ करोड रुपैयाँको छुट्टै ठगी प्रकरणमा संलग्न रहेको प्रारम्भिक अनुसन्धानले देखाएको छ। यस प्रकरणमा संगठित अपराधसम्बन्धी मुद्दा दर्ता गर्ने तयारी भइरहेको जनाइएको छ।
सीआईबीका अधिकारीहरूले आवश्यक कागजात नियन्त्रणमा लिएर बैंकका आन्तरिक लेनदेन, म्यानेजमेन्ट निर्णय प्रक्रिया र ठूला रकमको ट्रान्जेक्सन विवरणहरू अध्ययन सुरु गरेका छन्। छानबिन टोलीले राष्ट्र बैंकको प्राविधिक सहयोगमा बैंकका डिजिटल रेकर्ड, इमेल संवाद तथा लेखा विवरणहरू पनि परीक्षण गरिरहेको बताइन्छ।
