नुवाकोट–१ मा बद्री मैनालीको एकल सिफारिस: पार्टी पङ्क्ति र जनतामाझ ‘निर्विकल्प’
नुवाकोट–१ मा बद्री मैनालीको एकल सिफारिस: पार्टी पङ्क्ति र जनतामाझ ‘निर्विकल्प’
विदुर, नुवाकोट ।
आगामी फागुन २१ गते हुने प्रतिनिधिसभा निर्वाचनका लागि नेकपा (एमाले) नुवाकोट क्षेत्र नम्बर १ ले पार्टीका जिल्ला अध्यक्ष बद्री मैनालीलाई प्रत्यक्षतर्फको उम्मेदवारका रूपमा एकल सिफारिस गरेको छ।
शनिबार सम्पन्न क्षेत्र नम्बर १ को क्षेत्रीय कमिटी बैठकले सर्वसम्मत रूपमा मैनालीको नाम सिफारिस गर्ने निर्णय गरेको हो। बैठकमा सहभागी नेता तथा कार्यकर्ताहरूले मैनालीको नाममा व्यापक सहमति जनाउँदै उहाँलाई ‘निर्विकल्प’ उम्मेदवारको रूपमा अघि सारेका हुन्।
एमाले नुवाकोट क्षेत्र नम्बर १ का संयोजक शुशील खड्काका अनुसार पार्टी संगठन सुदृढीकरणमा मैनालीले पुर्याएको योगदान, उहाँको लामो राजनीतिक अनुभव र स्थानीय स्तरमा रहेको बलियो जनसमर्थनलाई मुख्य आधार मानेर यो निर्णय गरिएको हो। “क्षेत्रीय कमिटीमा सबैको एउटै आवाज र पूर्ण सहमति भएपछि हामीले अध्यक्ष मैनालीको नाम एकल सिफारिस गरेका हौँ,” संयोजक खड्काले बताए।
जिल्ला अध्यक्ष समेत रहनुभएका मैनाली यसअघि बागमती प्रदेशसभा सदस्यको रूपमा सक्रिय रहिसक्नुभएको छ। उहाँको सिफारिससँगै कार्यकर्ताहरूमा नयाँ उत्साह देखिएको छ।
अब राष्ट्रियता, विकास र जनजीविकाको सवालमा एमाले नै निर्विकल्प शक्ति हो भन्ने प्रमाणित गर्न जनताको बीचमा जाने तयारी भइरहेको एमाले नुवाकोटले जनाएको छ।
फागुन २१ को निर्वाचनका लागि नुवाकोट क्षेत्र नम्बर १ मा मैनाली र क्षेत्र नम्बर २ मा केशव पाण्डेको एकल सिफारिस भएसँगै एमालेले जिल्लाभर चुनावी अभियानलाई तीव्रता दिएको छ।
