इरानको विद्यालयमा भीषण बमबारीमा: मृतकको संख्या ८५ पुग्यो, मारिनेमा अधिकांश बालबालिका
इरानको विद्यालयमा भीषण बमबारी: मृतकको संख्या ८५ पुग्यो, मारिनेमा अधिकांश बालबालिका
काठमाडौ फागुन१७ , २०८२
इरानको दक्षिणी प्रान्त होरमोजगानको मिनाब सहरस्थित एक बालिका विद्यालयमा भएको शक्तिशाली हवाई आक्रमणमा परी मृत्यु हुनेको संख्या ८५ पुगेको छ। शनिबार भएको यस विभत्स घटनाले यतिबेला विश्वभरका सञ्चारमाध्यम र मानवअधिकारवादी संगठनहरूको ध्यान खिचेको छ।
स्थानीय समयअनुसार विद्यालयमा पठनपाठन भइरहेको अवस्थामा मिनाबको ‘शाजारे तैयबेह’ बालिका प्राथमिक विद्यालयमा बमबारी भएको हो। इरानको सरकारी समाचार एजेन्सी इर्ना का अनुसार, आक्रमणमा परी घटनास्थलमै धेरैको ज्यान गएको थियो भने अस्पताल लैजाँदै गर्दा र उपचारका क्रममा थप घाइतेहरूको मृत्यु भएपछि मृतकको संख्या ८५ पुगेको हो।
मृत्यु हुनेमा अधिकांश ६ देखि १२ वर्ष उमेर समूहका छात्राहरू रहेका छन्। आक्रमणमा ६० भन्दा बढी गम्भीर घाइते भएका छन्, जसको स्थानीय अस्पतालहरूमा उपचार भइरहेको छ। अस्पताल स्रोतका अनुसार धेरैजसो घाइतेहरूको अवस्था चिन्ताजनक रहेकाले मृतकको संख्या अझै बढ्न सक्ने खतरा छ।
इरानी सरकारले यस आक्रमणको सिधा आरोप अमेरिका र इजरायलमाथि लगाएको छ। इरानी विदेश मन्त्रालयले जारी गरेको विज्ञप्तिमा भनिएको छ, “यो सैन्य अभियानका नाममा निर्दोष बालबालिकामाथि गरिएको क्रूर नरसंहार हो। नागरिक क्षेत्र र विशेषगरी विद्यालयलाई निशाना बनाउनु अन्तर्राष्ट्रिय कानुन र मानवताको घोर उल्लंघन हो।”
यद्यपि, अमेरिकी रक्षा मन्त्रालय (पेन्टागन) ले आफ्ना आक्रमणहरू केवल इरानी सैन्य अखडा र क्षेप्यास्त्र केन्द्रहरूमा मात्र केन्द्रित रहेको दाबी गर्दै आएको छ। विद्यालयमा भएको क्षतिको बारेमा स्वतन्त्र पुष्टि हुन बाँकी रहे पनि सार्वजनिक भएका भिडियो फुटेजहरूमा विद्यालय भवन पूर्ण रूपमा ध्वस्त भएको र बालबालिकाका शैक्षिक सामग्रीहरू रगतले लतपतिएको अवस्थामा देखिएका छन्।
संयुक्त राष्ट्र संघले यस घटनाको कडा शब्दमा निन्दा गरेको छ। महासचिव एन्टोनियो गुटेरेसले विद्यालयहरू युद्धको मैदान हुन नहुने बताउँदै नागरिक सुरक्षाका लागि तत्काल युद्धविराम गर्न आह्वान गर्नुभएको छ। विश्वका विभिन्न देशहरूले यस दुःखद घडीमा इरानी जनताप्रति समवेदना प्रकट गरेका छन्।
यो आक्रमणसँगै मध्यपूर्वमा तनाव उत्कर्षमा पुगेको छ। इरानले यस “कायरतापूर्ण” हमलाको कडा बदला लिने चेतावनी दिएपछि खाडी क्षेत्रमा थप युद्धको कालो बादल मडारिएको छ।
