“बिराटनगर सभामा चिरन सी: ‘अपरिपक्व तर्कसँग बहस गर्नु समयको बर्बादी’”
बिराटनगर, मंसिर १५ । कोसी प्रदेशको राजधानी बिराटनगरमा आयोजित एकता सन्देश सभामा चिरन सीले समसामयिक राजनीतिक संवादबारे तीव्र असन्तुष्टि व्यक्त गरेका छन्। सभालाई सम्बोधन गर्दै उनले पछिल्लो समय राजनीति नाममा भइरहेका सतही बहसहरू देशको आवश्यकतासँग मेल नखाने भन्दै कडा टिप्पणी गरे।
चिरन सीका अनुसार अब प्रत्येक व्यक्तिसँग बहस गर्नुपर्ने बाध्यता छैन। कमजोर तर्क, अपरिपक्व सोच र जिम्मेवारीबोधविहीन पात्रहरूसँग बहस गर्नु आफैंमा समयको अपव्यय भएको उनले बताए। “अब दुई–चार वाक्य जोड्न नसक्नेहरूलाई राजनीतिक बहसको स्तरमा ल्याएर किन मूल्यवान समय खर्च गर्ने ?” भन्दै उनले वर्तमान राजनीतिक परिवेशमा बहसको गुणस्तर अत्यन्त खस्किएको उल्लेख गरे।
उनले भने, “गम्भीर विषयमा आवश्यक परे गहिरो बहस गर्न किन नहुने ? तर राजनीतिक हैसियत र वैचारिक परिपक्वता नै नभएका व्यक्तिहरूको पछाडि लाग्नु बदलिँदो युगप्रतिको अवहेलना हो।”
कार्यक्रममा उपस्थित नेताहरू, बुद्धिजीवी र युवाहरूलाई सम्बोधन गर्दै चिरन सीले जिम्मेवार, तथ्य–आधारित र परिपक्व राजनीतिक संवादको आवश्यकता थप बढेको बताए। उनका अनुसार देशले नयाँ दिशा खोजिरहेको बेला विवाद सिर्जना मात्रै गर्ने प्रवृत्तिबाट टाढा रहन सबैले आत्ममन्थन गर्नु जरुरी छ।
एकता सन्देश सभामा विभिन्न क्षेत्रका सहभागीहरूले प्रदेश र राष्ट्रको राजनीतिक स्थिरता तथा सामाजिक एकताबारे पनि विचार आदान–प्रदान गरेका थिए।
